No principio foi o verso. Rosalía de Castro
Sede Vigo
Do 15 de maio ó 15 de agosto de 2013
Co gallo da celebración do 150 aniversario da publicación na cidade de Vigo da obra Cantares Gallegos de Rosalía de Castro, a Fundación Barrié, a Fundación Rosalía de Castro, a Real Academia Galega e a Universidade de Vigo organizan unha exposición conmemorativa da efeméride entre o 15 de maio e o 15 de agosto de 2013. A través dunha coidada escolma de documentos, publicacións, fotografías, audiovisuais e obxectos, a mostra, comisariada por Pepe Barro, e estruturada arredor de 8 bloques temáticos (A Rosa e a Oliva. Pensar Galicia na cidade de Vigo: Rosalía, Murguía e os amigos de Vigo; Do folclore á literatura nacional. Nos cantares populares están os nosos clásicos; O primeiro canto: Cantares gallegos; Vigo, capital editorial. De Compañel ao século XXI; Unha factoría cultural. A familia Murguía-De Castro; Os pais do país. Rosalía e Murguía conforman o país que somos; Rosalía, muller intelectual galega. Voces e imaxes nunha proxección audiovisual arredor do histórico retrato de Rosalía por Modesto Brocos e Muller bandeira. Fitos, documentos e obxectos dun proceso de mitificación) propón un percorrido verbo da vida e da obra da inmortal escritora, con especial atención ao proceso vital e creativo que arrodeou a xénese e publicación dunha obra única coa que Rosalía abriu o proceso bautizado como ‘Rexurdimento’ da literatura e cultura galega.
A exposición acompañarase dun programa educativo, gratuíto para o público, composto por campamentos de verán, visitas guiadas e obradoiros para familias e grupos.
Unha retrospectiva sobre Rafael Moneo, en outono na Coruña
Rafael Moneo presenta na Coruña a primeira gran retrospectiva sobre a súa obra, coa exposición RAFAEL MONEO. Unha Reflexión Teórica dende a Profesión. Materiais de arquivo 1961-2013
José María Arias Mosquera, presidente da Fundación Barrié, e o arquitecto Rafael Moneo presentaron na Coruña a exposición que se inaugurará o 24 de outubro na sede da Fundación na Coruña e será amosada ao público ata o 30 de marzo de 2014. A mostra, unha produción propia da Fundación, é a primeira grande exposición retrospectiva do arquitecto contemporáneo español, Premio Pritzker 1996 e Premio Príncipe de Asturias das Artes 2012, e abordará 49 dos seus proxectos, distribuídos en cinco seccións, con 18 maquetas, 143 fotografías e 98 debuxos. Comisariada por Francisco González de Canales, coordinador cultural e profesor da Architectural Association de Londres, a exposición é un percorrido a través dos arquivos profesionais do arquitecto, no cal salienta a importancia do debuxo como ferramenta fundamental do arquitecto, e como medio para definir o seu pensamento. Este novo proxecto da Fundación Barrié complementarase cun programa didáctico e a edición dun catálogo. A escolma de materiais pon tamén unha especial énfase na importancia do debuxo como ferramenta fundamental da cal o arquitecto se valeu para desenvolver o seu traballo, e como medio para definir o seu pensamento. Acompañan aos debuxos maquetas e fotografías do arquivo que axudan a ilustrar as obras seleccionadas. Esta é a primeira ocasión na que un conxunto tan significativo de debuxos orixinais ven a luz para amosaren o oficio e o pensamento de Rafael Moneo.
Rafael Moneo: Unha Reflexión Teórica dende a Profesión narra a historia profesional dun arquitecto que buscou definir unha aproximación ao proxecto arquitectónico sobre unha base disciplinar estable no medio das condicións cambiantes da súa época, tomando a difícil posición de reivindicar a arquitectura como cultura e como forma específica de coñecemento. Mais esta narración non só estende diante dos nosos ollos a obra dun arquitecto en particular, senón que tamén reflicte unha parte importante da historia da arquitectura recente a través da súa ollada. Dende as tendencias organicistas e estruturalistas dos 1950s-60s, aos discursos italianos sobre a cidade nos 1960s-1970s, á ansiedade teórica dos arquitectos da costa este americana nos 1970s-1980s, á creación do star system global dos 1990s, a exposición amosa nas súas cinco seccións biográficas como o arquitecto resiste, reflicte e absorbe estes intereses diversos da súa época para conformar unha reflexión cultural propia. Hoxe en día, tras os excursos interdisciplinares das últimas dúas décadas, a revisión da carreira de Rafael Moneo aparece como unha ocasión oportuna para discutir cal é o traballo do arquitecto, que pode ofrecer á sociedade da súa época e que tipo de coñecemento implica.
A exposición acompañarase de actividades complementarias e dun programa educativo, paralelo á exposición e gratuíto, composto por campamentos de Nadal, obradoiros para familias, visitas guiadas e obradoiros para escolares. Así mesmo, a Fundación Barrié editará unha publicación que recollerá, amais dos contidos presentes na exposición, documentación e textos adicionais que complementan e enriquecen ditos contidos. O catálogo inclúe un índice ilustrado e anotado por Rafael Moneo de toda a súa obra.
Biografía de Rafael Moneo
José Rafael Moneo Vallés naceu en Tudela (Navarra) en 1937. Estudou Arquitectura na Escuela Técnica Superior de Arquitectura de Madrid obtendo o seu título en 1961. Na súa época de estudante traballou con Francisco Javier Sáenz de Oiza. Logo de un ano no estudio de Jørn Utzon en 1963 gaña a bolsa da Academia de España en Roma, permanecendo nesta cidade até 1965. Moneo ensinou nas escolas de arquitectura de Madrid e Barcelona foi chairman da Graduate School of Design de Harvard University entre 1985 e 1990, onde na actualidade ocupa a cátedra Josep Lluis Sert. A súa actividade docente foi acompañada do seu labor como conferenciante e crítico e os seus artigos foron publicados en numerosas revistas internacionais. En 2004 publicou Ansiedad Teórica y Estrategia Proyectual en Ocho Arquitectos Contemporáneos e en 2010 Apuntes sobre 21 Obras. Entre as súas obras construídas salientan o Museo Nacional de Arte Romano (1985), L’Illa Diagonal en Barcelona (1993), A Fundación Pilar e Joan Miró en Palma de Mallorca (1993), O Museo de Arte e Arquitectura de Estocolmo (1998), O Kursaal Auditorio e Centro de Congresos en San Sebastián (1999), a Ampliación do Concello de Murcia (1999), a Catedral de Nuestra Señora de los Ángeles (2002) ou a Ampliación do Museo do Prado (2007). Moneo recibiu numerosas distincións entre as que salientan o Pritzker Prize for Architecture en 1996, a Royal Gold Medal of the Royal Institute of British Architects en 2003 e o Premio Príncipe de Asturias das Artes en 2012.
A Fundación Barrié e a Arquitectura
A histórica vinculación da Fundación, creada en 1966, coa Arquitectura plasmouse nestes anos nun apoio sostido no tempo e concretado en sólidas accións como resposta á inquietude persoal de Pedro Barrié de la Maza. Entre elas, un programa expositivo no cal a Arquitectura ten un papel destacado. Os exemplos máis recentes son as exposicións sobre a obra dos arquitectos David Chipperfield (2010) e Gonçalo Byrne (2010/2011), ou Compañeiros de Oficio (2012/2013), exposición que propón unha reflexión verbo do papel da arquitectura vernácula como piar fundamental da obra dun imprescindible grupo de arquitectos contemporáneos como Alvar Aalto, Álvaro Siza, Tadao Ando, Peter Zumthor ou como Charles-Édouard Jeanneret e Le Corbusier; así como as mostras dedicadas a Jørn Utzon, Frank Lloyd Wright, Mies van der Rohe, Verner Panton ou George Nelson. O coñecemento e difusión da arquitectura ocupou sempre un lugar destacado entre os obxectivos da Fundación. Así, en 1967, a Fundación comeza as negociacións para a creación das Escolas de Arquitectura en Galicia. A construción e equipamento da Escola Universitaria de Arquitectura Técnica Pedro Barrié de la Maza (inaugurada en 1975) e da Escola Técnica Superior de Arquitectura Pedro Barrié de la Maza (inaugurada en 1980) absorberán durante máis de unha década boa parte dos recursos destinados pola Fundación a programas educativos, e constituíron o xermolo da universidade coruñesa.
Jessica Stockholder
Sede de Vigo
Do 14 de decembro de 2012 ao 31 de marzo do 2013
A Fundación Barrié mostra na súa sede de Vigo a exposición de Jessica Stockholder, a primeira retrospectiva en España en torno á obra da artista norteamericana.
Exemplo indiscutible do que se veu denominando como pintura expandida, Jessica Stockholder (Seattle, EE.UU., 1959) é unha das artistas máis influentes e valoradas da súa xeración no ámbito internacional.
Nesta produción propia da Fundación Barrié, que ocupa todas as salas da sede viguesa, Jessica Stockholder presenta varias instalacións e máis dunha decena de traballos recentes, entre eles a peza 8066, que forma parte da colección de pintura contemporánea da Fundación.
"Compañeiros de oficio, ata o 7 de abril en A Coruña"
Sede A Coruña
Do 7 de novembro de 2012 ao 7 de abril de 2013
A Fundación Barrié presenta na súa sede de A Coruña a exposición Compañeiros de oficio, unha reflexión sobre o papel que a arquitectura vernácula exerceu na obra de grandes mestres da arquitectura contemporánea.
Type in Motion
Sede A Coruña
Do 24 de maio ao 23 de setembro de 2012
A Fundación presenta, na súa sede de A Coruña, a exposición Type in Motion organizada en colaboración co Museo de Deseño de Zúric. A mostra ofrece un completo panorama da escena creativa internacional presente hoxe en día nos medios de comunicación. Baseándose en obras experimentais onde a tipografía asume o protagonismo, a exposición aproxima ao público a visión de deseñadores novos que exploran os novos formatos con enxeño e imaxinación ampliando as nosas oportunidades de «ler o mundo».
