Di K Non

A Fundación Barrié organiza, en colaboración coa Unidade Terapéutica e Educativa do Centro Penitenciario de Teixeiro (A Coruña), os talleres Di K Non para a prevención do consumo de drogas en adolescentes.

Di K Non está dirixido ao alumnado de 2º, 3º e 4º de Ensino Secundario, Bacharelato e Formación Profesional dos centros educativos públicos, privados e concertados das provincias de Lugo e A Coruña.
 
A actividade, baseada no intercambio de experiencias con internos da Unidade Terapéutica Educativa do Centro Penitenciario de Teixeiro, desenvolverase en dúas sesións:

• A primeira sesión realízase no propio centro educativo e nela participan membros do equipo de profesionais da UTE Teixeiro (Unidade Terapéutica e Educativa) acompañados por un grupo de 6 ou 7 internos da mesma Unidade. Realizada a introdución ao taller por un dos profesionais da UTE, os internos representan a obra teatral "O soño de vivir" (15 minutos) centrada na problemática das adiccións tras a que compartirán os seus testemuños de vida xerando un espazo de diálogo co alumnado no que expoñerán as consecuencias dos seus consumos co obxectivo de que identifiquen situacións de risco.  
• A segunda sesión ten lugar no C.P de Teixeiro, permitindo ao alumnado adentrarse na realidade das persoas privadas de liberdade. Para esta segunda sesión establécese un número máximo de 35 prazas por centro educativo (incluíndo alumnos e profesores), por motivos de capacidade.

Debido ás especiais características desta actividade, Di K Non ofrécese a un número limitado de centros educativos para este curso académico 2026-2027. No caso de que o número de solicitudes supere o número de prazas dispoñibles, estas seleccionaranse conforme o criterio do Centro Penitenciario.
 
Máis de 12.600 estudantes e 925 profesores participaron en Di K Non desde a súa posta en marcha no ano 2011. Unha experiencia única de sensibilización e concienciación sobre os riscos e as consecuencias do consumo de drogas.
 
Datas de celebración: desde outubro 2026 ata xuño 2027.
Actividade de gratuíta: prazas limitadas.
Preinscrición: a través do formulario
Participación: grupos escolares, solicitados polo centro educativo.
Prazo de preinscrición dos talleres 2026-2027: desde o 4 de setembro
Comunicación aos centros seleccionados: a través de correo electrónico