Feira de Proxectos - STANDS

PITEAS, promovido pola Fundación Barrié coa colaboración da Consellería de Cultura, Educación e Ordenación Universitaria e a participación da Unidade de Altas Capacidades da Universidade de Santiago de Compostela, nace como un proxecto de mellora da formación do profesorado e de apoio e asesoramento aos centros educativos na detección e educación do talento de alumnas e alumnos. 

Os once centros educativos participan na Feira de Proxectos da Cidade da Cultura exhibindo os resultados dos seus proxectos en diferentes formatos a todos os membros da comunidade educativa. Con isto preténdese dar visibilidade aos traballos realizados e dar aos rapaces a oportunidade de converterse non só nos protagonistas, senón tamén, nos auténticos expertos, expoñendo eles mesmos os produtos dos seus proxectos. Deste xeito, ao levar fóra das aulas o traballado, culmina o modelo SEM na súa fase III.
 
Asemade, no mesmo evento, terá lugar unha mostra das boas prácticas realizadas nos centros que están a participar do proxecto Piteas á que poderá asistir alumnado e profesorado de todos os niveis educativos de Galicia. Creamos así unha rede de colaboración entre centros que permite estender entre o profesorado galego unha dinámica de cooperación ao compartir novas metodoloxías e experiencias levadas a cabo nas aulas grazas a Piteas.

 
 
                    


CPR La Inmaculada (Santiago de Compostela)

2018

O colexio La Inmaculada de Santiago adéntrase no mundo do autismo co proxecto #acercaTEAmimundo. O proxecto xurdiu na clase de cuarto de primaria. Cando falaban sobre como mellorar o mundo houbo un alumno que expuxo que quería que os seus compañeiros coñecesen mellor esta realidade que el coñece moi ben. Para isto propuxeron dar difusión mediante unha carreira popular na Feira de Proxectos Piteas. Tiveron que traballar sobre a organización deste tipo de eventos, así como adentrarse no día a día dunha persoa con TEA para coñecelas mellor.
 
Ademais deste proxecto, no stand do colexio amosaranse cada media hora algúns dos outros proxectos realizados no centro, que xa dende o curso pasado cambiou a súa metodoloxía dende a etapa de Infantil aos maiores do colexio e integrou o SEM no seu día a día. Un dos proxectos vai sobre xeoloxía e volcáns, e os alumnos farán experimentos de ciencia poñendo en práctica o aprendido este curso. Os outros proxectos que se van amosar xiran en torno aos dinosauros, á auga, á literatura e á lingua de signos. Dous destes proxectos serán expostos por alumnado de 3 e 4 anos, dando protagonismo aos máis pequenos. 

 

anterior

siguiente

Stand 2: IES Fontem Albei (A Fonsagrada, Lugo)

2018

Vivindo en dous tempos é o proxecto do IES Plurilingüe Fontem Albei da Fonsagrada no que os alumnos recollen vivencias do último século na comarca atendendo aos aspectos culturais, sociais, demográficos, etnográficos e climáticos máis salientables. Este proxecto pretende facer unha posta en valor do patrimonio da comarca e da historia do noso concello.
 
Os obxectivos, como xa mencionamos, son a posta en valor do noso patrimonio e o acercamento dos nosos alumnos aos seus maiores.
 
Tras a realización das enquisas de interese, detectamos boa disposición por parte dos alumnos, polo que deseñamos actividades de motivación: o legado de Leónidas, unha mesa redonda cun ferreiro da comarca (último galardoado co Butelo de Ouro) e unha das xestoras do Museo e membro do padroado do Museo da Fonsagrada.
 
O alumnado participante, 1º e 2º da ESO e como invitados, 1º de BAC, que deseñaron unha actividade de motivación no Museo (Escape Room), realizaron diferentes proxectos con temática variada nas distintas materias: pirámides de poboación, climogramas, xogos con scratch, recreación de fotos antigas (principalmente de Walter Ebeling e Ruth Mathilda Anderson), así como a descrición doutras fotos que achegaron as familias, e que formarán parte da exposición temporal que se poderá visitar no noso centro e na que tamén se expoñerán obxectos antigos cedidos polas familias.
 
Houbo tamén unha recollida de cantigas e entrevistas que se empregarán na Feira nun proxecto sorpresa.


 

anterior

siguiente

Stand 3: CPI Aurelio Marcelino Rey García (Cuntis, Pontevedra)

2018

Os alumnos do CPI Aurelio Marcelino Rey García de Cuntis traballaron en diferentes proxectos nas tres etapas educativas, algúns dos cales veredes na Feira de Proxectos Piteas.

En Infantil, traballaron no proxecto de investigación Cuntis, terra de augas sobre a importancia da auga na cultura popular de Cuntis (póster).

Alumnos de 1º de Educación Primaria investigaron diferentes aspectos sobre o millo que culminaron coa elaboración dun xogo de taboleiro e coa presentación do libro que eles mesmos escribiron. Ámbolos dous estarán expostos no stand para xogar e ler.

En 2º de Primaria investigaron sobre a importancia dunha alimentación saudable a través do proxecto Dis - Fruta.

En 3º e 4º analizaron novas da prensa e da televisión para crear unha campaña de concienciación contra os lumes (póster).

Co gallo da conmemoración do 75º aniversario da publicación de O Principiño, os alumnos de 5º traballaron sobre esta obra para dala a coñecer ao resto do alumnado, e que tamén agora vos amosarán a vós.

Os alumnos de 1º e 2º da ESO investigaron e traballaron aspectos culturais, sociolóxicos, lingüísticos... que resultaron na creación da súa propia canle de televisión e que dá cabida a múltiples programas, non só da ESO, senón tamén doutras etapas. No stand da Feira, poderedes aprender o que supón a gravación dun programa de televisión e ata participar nel! Desfrute, entusiasmo e compromiso non faltarán.

 

anterior

siguiente

Stand 4: CEE de Panxón (Nigrán, Pontevedra)

2018

Dende o CEE de Panxón puxéronse en marcha este curso diferentes proxectos que implicaron a toda a Comunidade Educativa e do cal podemos ver algunhas mostras na Feira de Proxectos Piteas.

Toleamos in the space e CienCee son dous proxectos en que o alumnado de Primaria (de 4º a 6º)  abordaron o coñecemento científico a través de experiencias manipulativas e reais, organizando obradoiros científicos para diferentes audiencias (aula hospitalaria, outros centros…) e elaboraron a súa propia canle Youtube de tutoriais.
 
Grazas a PanxónCraft o alumnado de Primaria creou o seu propio videoxogo, cun escenario moi particular: o propio centro. Para iso, traballaron sobre diferentes aspectos matemáticos (cálculo, espazo, orientación, dimensión…) e construíron a escala un mundo en que deberás superar os retos que formulan.
 
Toleamos Rock Festival é un proxecto de centro onde Primaria e Secundaria traballan xuntos para organizar o primeiro festival de bandas de rock no centro. Para iso abordaron o estudo de diferentes materias para poder xestionar o evento dende un modelo económico e onde traballaron como profesionais en diferentes campos (técnicos, comunicación, xestión de bandas, venda de produtos, atención ao público…), convertindo o recinto escolar nun auténtico escenario de rock. Posters: A miña vida independente (4º Eso) Decorando o espazo (Primaria e ESO).


 

anterior

siguiente

Stand 5: CEIP Santiago Apóstol (Santiago de Compostela)

2018

Dende o CEIP Apóstolo Santiago púxose en marcha este curso un único proxecto  que implicou practicamente a toda a Comunidade Educativa e do que poderemos ver algunhas mostras na Feira de Proxectos  Piteas.
 
O patio que queremos é o proxecto no que participa o 85% do alumnado, o 50% do profesorado e a meirande parte do resto da comunidade educativa. 
 
Partimos dun traballo que se realizara no centro previamente para remodelar o patio e dos intereses do alumnado para a zona de lecer.
 
Gracias a O patio que queremos alumnado de Infantil e Primaria deseñou o seu patio de recreo. Para iso, traballaron sobre diferentes aspectos  matemáticos (cálculo, espazo, orientación, dimensión, custo, medidas, escalas…), lingüísticos (escribir cartas, correos electrónicos, invitacións, pedir presupostos...), e, coa axuda das familias, construíron as maquetas que permitirán  aos visitantes da feira de proxectos facerse unha pequena idea de como pode quedar o noso patio unha vez rematado o proxecto .
 
Tamén redactaron  as normas do xogo das damas xigante que pintaremos no patio e encargaranse de repartilas e explicalas a todo o que queira botar unha partida no noso espazo da feira de proxectos.     

Pósters: O patio que queremos.
      

anterior

siguiente

Stand 6: CEIP Condesa de Fenosa (Barco de Valdeorras, Ourense)

2018

Os alumnos e alumnas de 2º de primaria, moi afectados polos lumes da zona, decidiron facer unha campaña co obxectivo de concienciar á poboación acerca deste tema. No seu proxecto Investigalume tiveron que investigar acerca de causas e consecuencias dos lumes a través de vídeos, entrevistas a expertos e visitas aos bombeiros, entre outras actividades. Na Feira de Proxectos presentarán o dossier con todo o traballo realizado ademais de realizar enquisas aos asistentes para continuar a súa investigación.
 
Os alumnos e alumnas de 5º de primaria, no seu proxecto Explorando a Galaxia 3B-NUS, contactaron co astronauta Pedro Duque para iniciar a súa viaxe espacial. Eles mesmos cóntannos que “igual que os primeiros astrónomos, cando falamos do universo, cosmos, planetas... foron moitas as preguntas que xurdiron. Para respondelas, investigamos, experimentamos e plasmamos os nosos traballos que agora queremos compartir con todos aos que lles emociona mirar ao ceo cos ollos e tamén co corazón”. Na Feira veremos un planetario para aprender moitas cousas novas e teremos un pasapalabra e un xogo de mesa con escornabots para medir os nosos coñecementos sobre o sistema solar.
 
Finalmente, os alumnos e alumnas de 4º e 5º de primaria realizaron un proxecto sobre animais chamado Pelo, pico, escama, no cal recibiron a visita dunha protectora de animais coa que decidiron colaborar. Para conseguir axuda económica para dita asociación, organizaron unha carreira solidaria.

 

anterior

siguiente

Stand 7: CPR Eduardo Pondal (Cangas, Pontevedra)

2018

Os alumnos de 2º de Primaria do Eduardo Pondal viven en conexión total co mundo animal, así que achegamos o proxecto A arca do Pondal. Cando fixeron a asemblea para decidir o tema do seu proxecto tíñano clarísimo: os animais que máis queren, as súas mascotas. Un tema tan próximo e emotivo contribuíu  a unha grande mellora das súas competencias lingüística e artística, como veredes nas súas creacións. E como consecuencia das conversas no colexio e na casa, xurdiu un tema de actualidade: a avespa velutina. No noso stand poderedes ver as consecuencias da súa invasión e aprender a facer trampas para evitar a súa propagación. Tamén son protagonistas os animais da contorna, que animan as nosas frecuentes saídas escolares, dos que se recolle información nun libriño en inglés.

En 2º  da ESO preguntábanse: “Por que falamos o que falamos como o falamos? Que mecanismos físicos, neuronais, sociais, históricos e persoais inflúen nas producións lingüísticas humanas? Cal é o futuro da comunicación?". Intentamos responder todas estas cuestións no proxecto Comunica2. Apaixonante para lingüistas, que terán acceso a unha estrutura que conecta e relaciona as linguas, pero tamén para persoas interesadas na física, que poderán experimentar co son, e ca arqueoloxía, cun xacemento cheo de sorpresas! E para anglófil@s, unha vídeo-creación onde se analiza o pasado, presente e futuro do Inglés.



 

anterior

siguiente

Stand 8: CEIP Ben-Cho-Shey (Pereiro de Aguiar, Ourense)

2018

Multiplícate X3

Os nenos e nenas do noso colexio mergulláronse no misterioso e cautivador mundo dos bechos para presentar un proxecto que emociona, sorprende e comunica con propostas que van desde unha exposición fotográfica, unha peza teatral, audio - contos en lingua inglesa, bechorobots, mans que mostran unha chea de posibilidades...

Buscouse traballar, potenciar e desenvolver a intelixencia emocional do alumnado implicado, buscando paralelamente reforzar e consolidar a competencia lingüística, competencia matemática e competencias básicas en ciencia e tecnoloxía dado o seu carácter instrumental para condicionar o éxito ou o fracaso no percorrido dos nenos/as pola etapa.

Para conseguir tan ambicioso reto o proxecto de centro presenta tres ramificacións: Sorpréndete preséntase aos nenos/as como unha chea de experiencias que dende a escola esperten a súa curiosidade por aprender, Emociónate ábrenos o camiño a unha exploración consciente das nosas emocións para unha mellor xestión delas e finalmente, con Comunícate preséntase aos nenos/as coma un gabinete de prensa aberto as súas necesidades.

 

anterior

siguiente

Stand 9: CEIP Carballal (Marín, Pontevedra)

2018

No CEIP Carballal, realizáronse varios proxectos nos que colaboraron alumnado, profesorado, familias e profesionais de distintos sectores. Unha pequena mostra é "HumanizArte".
 
Co noso proxecto, o alumnado de 1º e 2º creamos o museo “HumanizArte” con obras baseadas no corpo humano, tras a visita á exposición “Un baile de máscaras para pintafontes” e a experiencia de traballar o curso anterior a Maruja Mallo e a Picasso e traballando nas áreas de lingua, matemáticas, plástica, CCNN.... Cada un de nós ten unha función propia dos profesionais que traballan nos museos: artistas; guías; monitores de obradoiros artísticos para os visitantes: resgado, collage, cores, etc; deseñadores do cartel, do tríptico, das entradas... 
 
"Arroz con chícharos... de Francia, patacas novas, pementos de Betanzos e máis cebolas... de Holanda"
A partires da celebración das “Semanas de consumo de froita fresca nas escolas” que facemos todos os anos no colexio, os/as alumnos/as de 6º preguntámonos por que consumiamos sempre as mesmas froitas e non variabamos un pouco con outras, e fixemos algúns descubrimentos sobre a pegada ecolóxica.
 
Tras buscar moita información e realizar moitos cálculos podemos contestar algunhas preguntas: Que é a pegada ecolóxica? Como afecta a nosa forma de comer á Terra? É igual comprar amorodos en decembro que en maio?. Invitámosvos a escoller a vosa cesta da compra e comprobar con nós as consecuencias para o planeta da vosa elección.
 
Póster: Vinde Ver Video Vindel

anterior

siguiente

Stand 10: IES A Xunqueira II (Pontevedra)

2018

Tras reflexionar acerca dos devastadores efectos da acción humana no Planeta Terra, convertémonos en axentes de cambio da nosa contorna. Situándonos nunha Pontevedra PreApocalíptica na que aínda estamos a tempo de reverter os efectos devastadores da acción humana, o alumnado profundou a través de diferentes proxectos:
 
ContaminAcción: Mediante a programación de sensores instalados en robots, saímos pola cidade para investigar a cantidade de partículas contaminantes en diferentes zonas. Proporemos un plan de acción para mellorar a vida urbana!
 
SonPontevedra: afronta a problemática da contaminación acústica e o seu efecto no corpo humano. As conclusións levaron ao alumnado a argallar diversas accións co fin de concienciar a toda a comunidade educativa a través de concertos solidarios e un plan de acción para substituír ruído por música no propio centro.
 
ReciclArte. Unha análise exhaustiva dos nosos hábitos levounos a elaborar un completo plan de reciclaxe de centro, con accións informativas e de concienciación á comunidade educativa.
 
Enerxías renovables. Ademais do informe que analiza o uso das enerxías renovables na cidade, o alumnado elaborou folletos informativos, accións de concienciación e un prototipo de cargador de dispositivos móbiles que funciona con enerxía solar.
 
D'un pont à l'autre. O alumnado de francés conectouse a través de videoconferencia con estudantes galos para coñecer os seus hábitos. A través dun vídeo creado por eles mesmos, dan a coñecer a cidade de Pontevedra e chegan a compromisos para combater as problemáticas medioambientais.
 
Obradoiros, Concursos, experimentos, concienciación e solidariedade nun Stand PreApocalíptico.


 
 
 

anterior

siguiente

Stand 11: CPR A Grande Obra de Atocha (A Coruña)

2018

Somos iguais? Somos diferentes?

Baixo este lema, os alumnos e as alumnas de 1º e 2º de primaria xunto co alumnado de 1º e 2º da ESO traballaron nun proxecto interdisciplinar no cal analizaron a situación da muller na sociedade actual en comparación con outros momentos históricos dende diferentes perspectivas e reflexionaron sobre distintos aspectos relativos á igualdade de xénero. O obxectivo principal deste proxecto é comprender a situación actual e propor liñas de actuación para construír unha cultura e unha sociedade onde se potencie a convivencia dende a igualdade e o respecto.
 
Respectando os estilos de aprendizaxe e os intereses do alumnado en secundaria realizáronse diferentes tarefas: distintas investigacións, composición de obras musicais e montaxe de coreografías, creación de vídeos e dun blog. En primaria elaboraron un crebacabezas sobre a igualdade que será facilitado a un centro de saúde e a unha biblioteca pública para a concienciación da comunidade.
 
Na Feira de Proxectos amosarán os traballos levados a cabo e realizarán diferentes actividades para o público visitante, entre as que se inclúen un obradoiro de composición musical e unha master class de baile para deseñar as túas propias coreografías.
 

 

anterior

siguiente